थाहानगर । थाहा नगरपालिकाको शिखरकोट–धारापानी–ऋषेश्वर–सिमभन्ज्याङ–दामन पदयात्रामा सहभागी यात्रुहरुले यो पदमार्गलाई प्रकृतिको भण्डारको रुपमा ब्याख्या गरेका छन् ।
नेपालको राष्ट्रिय फूल लालीगुराँसका बिभिन्न प्रजाति दामन सिमभञ्ज्याङक्षेत्रमा पाईने हुनाले यस पदमार्गलाई गुराँस पदमार्ग नामांकरण गर्नपनि सकिने यात्रामा सहभागीहरुले बताए ।
राजधानीबाट नजिक रहेको थाहा नगरपालिकाको वडा नं. ३ र ४ मा पर्ने यो पदमार्ग अत्यन्तै मनोरम भएको समेत यात्रामा सहभागी हुनेहरुले बताए ।
चैत्र ३ गते शनिवार काठमाडौंका ह्याप्पी हाईकर्सका टोली र स्थानीय समेत ७५ जनाले यो पदमार्गमा पदयात्रा गरे ।
शिखरकोटमा स्थानीय महिला खैजडी भजन सहित थाहा नगरपालिकाका प्रमुख बिष्णुबहादुर बिष्ट, उपप्रमुख भरत गोपाली र स्थानीयले पदयात्रीहरुलाई स्वागत गरेका थिए ।
शिखरकोटबाट धारापनी ऋषेश्वर खोला र जंगल हुँदै हिन्दु र बौद्ध धर्मको समान आस्थाका केन्द्र ऋषेश्वर महादेवको दर्शन, तारेभिर अवलोकन, मकवानपुर जिल्लाको सबैभन्दा अग्लो स्थान सिमभञ्ज्याङमा रहेको प्रकृतिक ताल र ताल आसपाका बिभिन्न प्रजातिका गुराँस अवलोकन, दामनको पर्वतीय वनस्पति उद्यानमा वनस्पतिसंगै गुराँस हेरेर, नेपालकै पहिलो भ्युटावर (शितल टावर), नयाँगाउँ हुँदै करिव १९ किलोमिटरको पार गर्दै पुनः शिखरकोट आईपुगेपछि पदयात्रा समापन हुने यस पदयात्राका परिकल्पनाकार गणेश बिष्टले बताए ।
थाहा नगरलाई पर्यटकीय रुपमा प्रचारप्रसार गर्न तल्लीन युवा फोटोपत्रकार बिष्टले शितल वातावरणमा प्राकृतिक, धार्मिक र पर्यटकीय यात्राको लागि यो पदयात्रा सहासिक र रोमान्चक हुने बताए ।
पदयात्रीहरुलाई सिमभञ्ज्याङमा स्थानीय होटल व्यवशायीहरुले फूलमाला सहित चिया खुवाएर स्वागत गरेका थिए ।
बसन्त ऋतुको सुरुवातसंगै रुख बिरुवामा नयाँ पालुवाका साथ गुराँस फुल्ने सिजनमा यो पदयात्रा निकै रोमाञ्चकारी हुने स्थानीय अनिता बिष्टले बताईन् ।
पदयात्रामा सहभागी ६८ वर्षिय सनतकुमार रेग्मीले एकदिनको पदयात्राको लागि यो रुट राम्रो भएको र फेरि पनि आउने बताए ।
स्थानिय सरकार तथा संघ संस्थाले यो पदमार्गको बारेमा परिचय सहितको बोर्ड र ठाउँ ठाउँमा पथनिर्देशन भए यात्रामा सहजता हुने ह्याप्पी हाईकर्सका नवराज अर्यालले बताए ।
प्राकृतिक शान्त वातावरणको अनुभव गर्न पनि थाहा नगरपालिका उपयुक्त स्थान भएको पदयात्रीहरुले बताए । यो सिजनमा दामन सिमभञ्ज्याङका डाँडाँलाई ढाक्नेगरी गुराँस फुल्ने भएकोले यस क्षेत्रमा भ्रमण गर्नेहरु निकै आनन्दित हुन्छन् ।
पहाडी थुम्को वरिपरि स–साना गाउँवस्ती र हरियालीको संगमले दामन पदयात्रा गर्न निकै आकर्षक गन्तब्य बन्नसक्ने पदयात्री राजाराम फँुयालले बताए ।
उनले भीडभाडबाट टाढा रहेको दामन तराईको गर्मी छल्न र व्यस्त दैनिकीबाट रिफ्रेस हुने उपयुक्त गन्तब्य दामन रहेको बताए । अझ गुराँस र विभिन्न जडिबुटीका कारण एक रमणीय गन्तव्य मात्र नभई प्रकृतिको भण्डार नै भएको फुयाँलको तर्क छ ।–राजकुमार के.सी.
(तस्विरहरु ः गणेश बिष्ट)
0 comments
Write Down Your Responses